မဟော်သဓာကျောင်းအမှု တရားလို ရုံးချိန်းခြောက်ကြိမ်ပျက်

ခေမဏီဝင်း
2019-12-18
အီးမေးလ်
မှတ်ချက်ပေးပါ
Share
ပုံနှိပ်ပါ
မဟော်သဓာကျောင်း ကော်မတီဝင်အချို့နဲ့ လာရောက်ဝန်းရံသူများကို တွေ့ရစဉ်
မဟော်သဓာကျောင်း ကော်မတီဝင်အချို့နဲ့ လာရောက်ဝန်းရံသူများကို တွေ့ရစဉ်
Photo: Khaymani Win‎/ RFA

ခွင့်ပြုချက်မရှိပဲ မဟောသဓာ ကိုယ်ပိုင်အထက်တန်းကျောင်း ဆောက်လုပ်တဲ့အတွက် ကျောင်းကော်မတီဝင် တွေကို အထက်မြန်မာပြည် မြေနဲ့အခွန်တော် ဥပဒေပုဒ်မ ၆၉ (၂) အရ အခုနှစ် ဇန်နဝါရီလက စွဲဆိုထားတာကို ပလပ်ပေးဖို့အတွက် ဒီကနေ့ရုံးချိန်မှာ တင်ပြခဲ့ပါတယ်။  

ဆရာတော် ဦးဝီရသူ အပါအဝင် ဆရာတော်ကြီးအချို့ ဦးဆောင်တည်ဆောက်မယ့် မဟော်သဓာ အမျိုးသားရေး ကိုယ်ပိုင်အထက်တန်းကျောင်းဟာ ခွင့်ပြုချက်မရှိပဲ တည်ဆောက်ဖို့ ကြိုးစားနေတဲ့အတွက် မန္တလေး၊ ပုသိမ်ကြီးမြို့နယ် အထွေထွေအုပ်ချုပ်ရေးဦးစီးဌာနက အုပ်ချုပ်ရေးမှူး ဦးညွန့်လင်းက တရားလိုပြုလုပ် တရားစွဲဆိုထားတာဖြစ်ပါတယ်။

မဟော်သဓါကျောင်းရဲ့ တရားလွတ်တော်ရှေ့နေ ဦးဇော်ဝိတ်က “တရားစွဲတယ်၊ ပထမအချိန်းကတည်းက သူပျက်တယ်။ ပျက်ခဲ့ရင် ဥပဒေကပေးထားတဲ့ ရာဇဝတ်ကျင့်ထုံး ၂၄၇  အရ ပလပ်ရမယ်။ စစ်ဆေးရန်လိုရင် သူပျက်ကွက်လို့မရဘူး ။ သူမလာတဲ့အချိန်းအတွက် အခြားသူတွေနစ်နာတယ်” လို့ပြောပါတယ်။

အခုလို ပလပ်ခွင့် တောင်းဆိုတာနဲ့ ပတ်သတ်ပြီးလာမယ့် ၂၃ ရက်နေ့မှာ အမိန့်ချသွားမယ်လို့ သိရပါတယ်။ ပြစ်မှုထင်ရှား လို့ ရှိရင် ဒီပုဒ်မရဲ့ အမြင့်ဆုံး ပြစ်ဒဏ်က တစ်လပါ။

တရားရုံးချိန်း ၁၈ ကြိမ် ချိန်းဆိုပေမယ့် တရားလိုဘက်က ပျက်ကွက်တာ ခြောက်ကြိမ်ရှိပြီဖြစ်ပြီးတော့၊ ဥပဒေအရ ဆိုရင် တရားလိုဖြစ်သူဟာ ရုံးချိန်းတစ်ချိန်းမှ ပျက်ကွက်ခွင့် မရှိဘူးလို ရှေ့နေဖြစ်သူ ဦးဇော်ဝိတ်က ဆိုပါတယ်။

တရားလိုဖြစ်သူ ပုသိမ်ကြီးမြို့နယ် အထွေထွေအုပ်ချုပ်ရေးမှူး ဦးညွန့်လင်းဟာ သင်တန်းသွားနေရတဲ့အတွက် ရုံးချိန်းတက်ရောက်ဖို့ ပျက်ကွက်တာလို့ ပုသိမ်ကြီးမြို့နယ် တရားရုံးက သိရပါတယ်။

တရားလိုပြုတိုင်တန်းသူ ပုသိမ်ကြီးမြို့နယ် အထွေထွေအုပ်ချုပ်ရေးမှူးကို RFA က ဖုန်းနဲ့ ဆက်သွယ်မေးမြန်း ပေမယ့် လက်ခံဖြေကြားခြင်းမရှိပါဘူး။

ကျောင်းတည်ဆောက်ဖို့အတွက် အခုနှစ် ဇန်နဝါရီလ ၂၆ ရက်နေ့မှာ ပုသိမ်ကြီးမြို့နယ်၊ ကျောက်ချောကျေး ရွာမှာ ပန္ဓက်ရိုက်ခဲ့ပြီး ဇွန်လမှာတော့ အမှုဖွင့် တရားစွဲဆို ထားတာဖြစ်ပါတယ်။

တည်ဆောက်မဲ့ကျောင်းဟာ အမျိုးသားရေး ဆရာတော်ဖြစ်တဲ့ ဆရာတော်ဝီရသူနဲ့ ဆရာတော်ကြီး အချို့က ဦးဆောင်တည်ဆောက်တာဖြစ်ပါတယ်။ ။

ဆရာတော် ဝီရသူဟာ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို ပုတ်ခတ်စော်ကားလို့ အစိုးရရဲ့ တရားစွဲ ဆိုခြင်းကို ခံရပြီးတော့ လက်ရှိအချိန်မှာ ဖမ်းဝရမ်း ထုတ်ခံထားရပြီး ထွက်ပြေးလွတ်မြောက်နေပါတယ်။

အခုလိုမျိုး တည်ဆောက်မယ့် မဟော်သဓာ အမျိုးသားရေး ကိုယ်ပိုင်အထက်တန်း ကျောင်းတွေကို ရန်ကုန်နဲ့  တောင်ကုတ်မြို့တွေမှာ ဖွင့်လှစ်ထားပြီးတော့ ငွေကြေးမတတ်နိုင်တဲ့ ကျောင်းသားတွေ အဲဒီကျောင်းတွေမှာ တက်ရောက်သင်ကြားပြီးတော့ အစိုးရ အတန်းတင်စာမေးပွဲတွေ ဝင်ဖြေကြပါတယ်။

ကွန်မင့်များ (0)
Share
ဆိုက်တခုလုံးသို့