ကုလအေဂျင်စီ ဖွံ့ဖြိုးရေး စီမံကိန်းတွေ ငြိမ်းချမ်းရေးကော်မရှင်ကို တင်ပြရမည်

2019-10-10
အီးမေးလ်
မှတ်ချက်ပေးပါ
Share
ပုံနှိပ်ပါ
ကုလသမဂ္ဂ နိုင်ငံတကာအကူညီပေးရေးအဖွဲ့ဝင် တစ်ဦးကို တွေ့ရစဉ်
ကုလသမဂ္ဂ နိုင်ငံတကာအကူညီပေးရေးအဖွဲ့ဝင် တစ်ဦးကို တွေ့ရစဉ်
Photo: UNHCR

မြန်မာနိုင်ငံထဲမှာရှိတဲ့ ကုလသမဂ္ဂ UN အေဂျင်စီတွေ၊ နိုင်ငံတကာ အကူညီပေးရေးအဖွဲ့တွေအနေနဲ့ တိုင်းရင်း သားဒေသတွေမှာ ဖွံ့ဖြိုးရေးအကူညီပေးရေးလုပ်ငန်းတွေ ဆောင်ရွက်မယ်ဆိုရင် ဒေါ်အောင်ဆန်းစုကြည် ဦးဆောင် တဲ့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာနကို အသိပေးပြီးမှ ဆောင်ရွက်ကြဖို့ ညွှန်ကြားတယ်လို့ သိရပါတယ်။

ကုလသမဂ္ဂဝန်ဆောင်မှုရုံး UNOPS ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် Andrew Kirkwood က စာကို မနေ့က လက်ခံရရှိကြောင်း အတည်ပြုပေးပါတယ်။ ယခင်က ကုလသမဂ္ဂအေဂျင်စီတွေ လုပ်ငန်းတွေ ဆောင်ရွက် မယ်ဆိုရင် သက်ဆိုင်ရာဝန်ကြီးဌာန သို့မဟုတ် ပြည်ထောင်စုအစိုးရရဲ့ ခွင့်ပြုချက်နဲ့ ဆောင်ရွက်ကြရတာဖြစ်ပြီး၊ အခုတကြိမ်မှာတော့ ငြိမ်းချမ်းရေးဗဟိုဌာနကို ဖြတ်သန်းပြီးမှ ဆောင်ရွက်ကြရမယ့်သဘောဖြစ်တယ်လို့ UN အဖွဲ့စည်းမှာ တာဝန်ထမ်းဆောင်နေသူတွေက ပြောကြပါတယ်။

နိုင်ငံခြားရေးဝန်ကြီးဌာနက ပေးပို့လိုက်တဲ့ညွှန်ကြားစာမှာ ကုလအဖွဲ့အစည်းတွေအနေနဲ့ တိုင်းရင်းသား လက်နက်ကိုင် အဖွဲ့အစည်းတွေ သို့မဟုတ် တိုင်းရင်းသားနိုင်ငံရေးပါတီတွေနဲ့ သက်ဆိုင်ရာတိုင်းဒေသကြီးတွေမှာ လုပ်ငန်းတွေဆောင်ရွက်မယ်ဆိုရင် သံတမန်နည်းလမ်းအရ ငြိမ်းချမ်းရေးဗဟိုဌာနကို အသိပေးရမှာဖြစ်ကြောင်း ရေးသားထားပါတယ်။

ကုလသမဂ္ဂဌာနေကိုယ်စားလှယ်နှင့် လူသားချင်းစာနာရေး ညှိနှိုင်းရေးမှူးရုံးရဲ့ ပြန်ကြားရေးအရာရှိ ဦအေးဝင်း ကတော့ သူ့အနေနဲ့ သိရှိထားခြင်းမရှိကြောင်းနဲ့ ဆက်လက်မေးမြန်းပေးမယ်လို့ အီးမေးလ်ကနေ ပြန်ကြားပါတယ်။

တစ်နိုင်ငံလုံး အပစ်ခတ်ရပ်စဲရေး လက်မှတ်ရေးထိုးထားတဲ့ ALP အဖွဲ့က ဒေါ်စောမြရာဇာလင်းကလည်း အစိုးရအနေနဲ့ တိုင်းရင်းသားတွေကို ပိုမိုထိန်းချုပ်တာမျိုး မလုပ်သင့်ဘူးလို့ မှတ်ချက်ပြုပါတယ်။

လက်နက်ကိုင်တိုင်းရင်းသားအရေး ကျွမ်းကျင်သူ ရန်ကုန်အခြေစိုက် ဦးမောင်မောင်စိုးက အခုတပတ်အတွင်း ပို့လိုက်တဲ့စာဟာ ၂၀၁၆ NLD တက်လာကတည်းက ချမှတ်ထားတဲ့မူဖြစ်ပြီးတော့၊ ဗဟိုချုပ်ကိုင်မှုကို ဆက်လက်ကျင့်သုံးတဲ့သဘောဖြစ်တယ်လို့ ဆိုပါတယ်။

မြန်မာ့မဟာဗျူဟာနှင့် မူဝါဒလေ့လာရေး အင်စတီကျု  ISP Myanmar ရဲ့ ပြင်ပဆက်ဆံရေးအရာရှိ ဦးအောင်သူငြိမ်းက အစိုးရရဲ့ဆောင်ရွက်ချက်က ကုလအဖွဲ့အစည်းတွေကို ထိန်းချုပ်ချင်တဲ့သဘောမျိုး တွေ့ရကြောင်းနဲ့  ဒါပေမဲ့ တကယ့်လက်တွေ့မှာ ထိန်းချုပ်လို့ရနိုင်ခြေနည်းကြောင်းပြောပါတယ်။

အခုလို တင်းကျပ်လိုက်ခြင်းရဲ့ နောက်ဆက်တွဲအနေနဲ့ ပြည်တွင်းစစ်ဘေးရှောင်တွေရဲ့ လူသားချင်း စာနာထောက်ထားရေး အကူအညီတွေပေါ် သက်ရောက်မှုရှိလာနိုင်လို့ သူက ပြောပါတယ်။

မြန်မာအရေးလေ့လာသူတွေကို ဆက်သွယ်မေးမြန်းတဲ့အခါမှာ ငြိမ်းချမ်းရေးကော်မရှင်ရဲ့ ဆောင်ရွက်ချက်က ဗဟိုချုပ်ကိုင်မှုစနစ်ကို ဦးတည်နေကြောင်း၊ ကုလသမဂ္ဂအေဂျင်စီတွေရဲ့ မြေပြင်ဆောင်ရွက်ချက်တွေ ပိုပြီးနှောင့်နှေးကြန့်ကြာစေနိုင်ကြောင်း သုံးသပ်ကြပါတယ်။

ငြိမ်းချမ်းရေးကော်မရှင်ရဲ့ အတွင်းရေးမှူး အငြိမ်းစား ဒုတိယဗိုလ်ချုပ်ကြီးဟောင်း ဦးခင်ဇော်ဦးကို မနေ့က RFA ဆက်သွယ် မေးမြန်းတဲ့အခါ သူ့အနေနဲ့ သတင်းမီဒီယာကို ပြောပိုင်ခွင့်မရှိဘူးလို့ပြောပါတယ်။

နိုင်ငံတော်သမ္မတရုံးပြောခွင့်ရ ဦးဇော်ဌေး လည်း လက်ခံဖြေကြားခြင်းမရှိပါဘူး။ မြန်မာနိုင်ငံမှာ ကုလသမဂ္ဂက လူသားချင်စာနာ ပေးရေးအကူအညီတွေကို ၁၉၄၈ ကတည်းကဖြစ်ပြီးတော့ မြန်မာနိုင်ငံနဲ့ သက်ဆိုင်တဲ့ UN ဌာနေကိုယ်စားလှယ်ရုံးပေါင်း ၁၇ ခု ဖွင့်လှစ်ပြီး ဆောင်ရွက်နေတယ်လို့ ကုလသမဂ္ဂဖွံ့ဖြိုးတိုးတက်ရေးအစီအစဉ် UNDP ရဲ့ စာမျက်နှာမှာ ဖော်ပြထားပါတယ်။

(RFA သတင်းထောက် ကိုမိုးမြင့် ပေးပို့သည်)

ကွန်မင့်များ (0)
Share
ဆိုက်တခုလုံးသို့